सोमवारी दिल्ली कॅपिटल्सने चेन्नई सुपर किंग्जचा ३ गडी राखून पराभव केला आणि गुणतालिकेत अग्रस्थानी झेप घेतली. अटीतटीच्या या सामन्यात दिल्लीने नाणेफेक जिंकत प्रथम गोलंदाजी करण्याचा निर्णय घेतला. यानंतर दिल्लीच्या गोलंदाजाची चांगली गोलंदाजी करत चेन्नईला २० षटकात ५ बाद १३६ धावांवर रोखले. धावांचा पाठलाग करताना दिल्लीचा स्फोटक फलंदाज शिमरोन हेटमायरने विजयी फटका लगावला. विशेष म्हणजे विजयाचा आनंद साजरा करताना त्याने थेट चेन्नईच्या गोलंदाजाच्या पाठीवर उडी मारली.
चेन्नईन गोलंदाजी करताना शिमरोन हेटमायरला जीवदान दिले. शिमरोन हेटमायरने १८ चेंडूत २८ धावा ठोकल्या. विजयानंतर शिमरोनने शेवटची ओव्हर टाकणारा आपला वेस्ट इंडिजचा सहकारी ब्राव्होच्या दिशेने धाव घेत त्याच्या पाठीवर उडी मारली आणि आनंद साजरा केला. दिल्लीकडून १८ धावांत २ बळी घेणाऱ्या अक्षर पटेलला सामनावीर पुरस्काराने गौरवण्यात आले. चेन्नईविरुद्धच्या विजयासह दिल्लीच्या खात्यात आता २० गुण झाले आहेत.
चेन्नईच्या छोटेखानी धावसंख्येचा पाठलाग करताना पॉवरप्लेमध्ये दिल्लीने सलामीवीर पृथ्वी शॉला गमावले. चेनन्नईचा वेगवान गोलंदाज दीपक चहरने त्याला झेलबाद केले. शॉने १८ धावा केल्या. पहिला गडी बाद झाल्यानंतर शिखर धवनने कोणताही दबाव न घेता फटकेबाजी केली. चहरने टाकलेल्या पाचव्या षटकात धवनने २१ धावा चोपल्या. पुढच्याच षटकात दिल्लीने अर्धशतक पूर्ण केले, पण त्यांना श्रेयस अय्यरला गमवावे लागले. ६ षटकात दिल्लीने २ बाद ५१ धावा केल्या. नवव्या षटकात रवींद्र जडेजाच्या चेंडूवर मोठा फटका खेळताना ऋषभ पंत झेलबाद झाला.पंतने १५ धावा केल्या. त्यानंतर पदार्पणवीर फलंदाज रिपाल पटेलने (१८) थोडा प्रतिकार केला. पण १३व्या षटकात जडेजाने त्याला तंबूत पाठवले. रिपाल बाद झाल्यानंतर रवीचंद्रन अश्विनला बढती मिळाली होती. पण शार्दुल ठाकूरने त्याचा त्रिफळा उडवला. याच षटकात शार्दुलने खेळपट्टीवर स्थिरावलेल्या धवनला बाद करत दिल्लीच्या अडचणी वाढवल्या. धवनने ३ चौकार आणि २ षटकारांसह ३९ धावा केल्या. ९९ धावांत दिल्लीचे ६ फलंदाज तंबूत परतले. त्यानंतर शिमरोन हेटमायर आणि अक्षर पटेलने भागीदारी केली. ड्वेन ब्राव्होने टाकलेल्या १८व्या षटकात हेटमायरला जीवदान मिळाले. कृष्णप्पा गौतमने त्याचा सोपा झेल सोडला शिवाय चौकारही दिला. शेवटच्या षटकात दिल्लीला विजयासाठी ६ धावांची गरज होती, .या षटकात ब्राव्होने अक्षरला बाद करत सामन्याची रंगत वाढवली. पण त्यानंतर आलेल्या कगिसो रबाडाने चौकार खेचत दिल्लीच्या विजयावर शिक्कामोर्तब केले. हेटमायरने २ चौकार आणि एका षटकारासह नाबाद २८ धावा केल्या.
मागच्या सामन्यात शतकी खेळी केलेला ऋतुराज गायकवाड आणि फाफ डु प्लेसिस यांनी चेन्नईच्या डावाची सुरुवात केली. त्यांनी वेगवान गोलंदाज एनरिक नॉर्कियाच्या पहिल्याच षटकात १६ धावा ठोकल्या. आक्रमक झालेल्या डु प्लेसिसला फिरकीपटू अक्षर पटेलने बाद करत चेन्नईला पहिला धक्का दिला. डु प्लेसिस १० धावा करू शकला. त्यानंतर रॉबिन उथप्पा चेन्नईसाठी पहिला सामना खेळण्यासाठी मैदानात उतरला. पाचव्या षटकात नॉर्कियाने ऋतुराजला आपल्या जाळ्यात फसवले. मोठा फटका खेळण्याच्या नादात ऋतुराज झेलबाद झाला. ऋतुराजला १३ धावा करता आल्या. पॉवरप्लेमध्ये चेन्नईने २ बाद ४८ धावा केल्या. मधल्या फळीतील मोईन अलीलाही मोठी खेळी करता आली नाही. अक्षरने त्याला आठव्या षटकात झेलबाद केले. पुढच्याच षटकात अश्विनने उथप्पाला आपल्याच गोलंदाजीवर झेलबाद केले. उथप्पाने १९ धावा केल्या. त्यानंतर दिल्लीच्या वेगवान गोलंदाजांनी धोनी आणि रायुडूला फटकेबाजी करू दिली नाही. १७व्या षटकात चेन्नईने शतकी टप्पा ओलांडला. पुढच्याच षटकात दोघांनी आपली अर्धशतकी भागीदारी पूर्ण केली. १९व्या षटकात रायुडूने अर्धशतक पूर्ण केले. दिल्लीचा गोलंदाज आवेश खानने शेवटच्या षटकात धोनीला झेलबाद केले. धोनीने २७ चेंडूत १८ धावांची संथ खेळी केली. आवेशने या षटकात ४ धावाच दिल्या. चेन्नईने २० षटकात ५ बाद १३६ धावा केल्या. रायुडूने ५ चौकार आणि २ षटकारांसह नाबाद ५५ धावांची खेळी केली.