छोट्या पडद्यावरील लोकप्रिय अभिनेता अंशुमन मल्होत्रा सध्या चर्चेत आहे. या चर्चा त्याने करोना निर्बंध तोडत वाढदिवस सुधागड येथील किल्ल्यावर साजरा केला असून मैत्रिणीसोबतचे काही आक्षेपार्ह फोटो सोशल मीडियावर शेअर केल्यामुळे सुरु झाल्या आहेत. हे फोटो पाहून दुर्गप्रेमी संताप व्यक्त करत आहेत.

अंशुमनने वाढदिवशी त्याच्या इन्स्टाग्राम अकाऊंट स्टोरीला काही फोटो शेअर केले होते. या फोटोमध्ये तो काही मित्र मैत्रिणींसोबत सुधागड येथील किल्ल्यावर फिरायला गेला होता. तिथेच त्याने वाढदिवस साजरा केला. दरम्यान, त्याने शेअर केलेल्या एका फोटोत तो मैत्रिणीला किस करताना दिसत आहे. दरम्या या फोटोवरुन त्याच्यावर टीका होत आहे.

अंशुमनने त्याच्या इन्स्टाग्राम अकाऊंटवरही किल्ल्यावरचे काही फोटो आणि व्हिडीओ शेअर केले आहेत. एकीकडे अंशुमनच्या फोटोवर आक्षेप घेत टीका होत असताना दुसरीकडे काही नेटकरी पाठिंबा देत आहेत. त्याचे हे व्हिडीओ पाहून ‘कोणाच्याही भावना दुखावल्या गेल्याचे मला दिसत नाही’ असे एका नेटकऱ्याने म्हटले आहे.

तर दुसऱ्या एका नेटकऱ्याने, ‘यात काही चुकीचे नाही आणि माझ्या मते कुणाच्याही भावना दुखावल्या गेल्याचे दिसत नाही’ असे म्हटले आहे.

अंशुमनने आजवर काही मालिका आणि चित्रपटांमध्ये काम केले आहे. त्याने २०१४मध्ये प्रदर्शित झालेल्या ‘हैदर’ या चित्रपटातून बॉलिवूडमध्ये पदार्पण केले आहे. तसेच त्याने लाइफ ओके वाहिनीवरील ‘नागार्जुन’ या मालिकेत भूमिका साकारली होती.