मुंबई, 11 सप्टेंबर- मनोरंजनसृष्टीत एकापाठोपाठ एक दुःखद घटना घडत आहेत. प्रसिद्ध मल्याळम अभिनेता रमेश वलियासाला(Ramesh Waliasala) यांचं दुःखद निधन झालं आहे. दुर्दैवी बाब म्हणजे या अभिनेत्याचा मृतदेह त्यांच्या घरी गळफास घेतलेल्या अवस्थेत आढळून आला. पोलिसांनी या प्रकरणाला अनैसर्गिक मृत्यूची नोंद करत तपास सुरू केला आहे. केरळचे रमेश हे एक प्रसिद्ध मल्याळम टीव्ही अभिनेता आहेत. त्यांनी अनेक मालिकांमध्ये अभिनय करून आपला ठसा उमठवला आहे.तसेच त्यांनी चित्रपटांतसुद्धा काम केलं आहे. अवघ्या दोन दिवसांपूर्वी रमेश हे शूटिंगवरून घरी परतले होते. 22 वर्षांचं अभिनय करिअर- रमेश वलियासाला हे गेली 22 वर्षे मल्याळम अभिनय क्षेत्रात कार्यरत होते. ते सर्वात व्यग्र सहाय्यक अभिनेत्यांपैकी एक होते.त्यांनी अनेक मालिकांमध्ये लक्षवेधी काम केलं आहे. त्यांचा मोठा चाहतावर्गदेखील होता. रमेश यांनी महाविद्यालयीन काळापासून अभिनय करण्यास सुरुवात केली आहे. रमेश यांच्या अशा संशयास्पद मृत्यूने सर्वांनाच धक्का बसला आहे. पोलिसांनी पुढील तपास सुरु केला आहे. अभिनेत्याच्या मृत्यूची माहिती सर्वप्रथम निर्माता आणि प्रोडक्शन कंट्रोलर एन. एम. बदूशा यांनी सोशल मीडियावरून दिली होती.