औंध जिल्हा रुग्णालय परिसरात उभारण्यात येणाऱ्या जिल्हा दिव्यांग पुनर्वसन केंद्राचं उपमुख्यमंत्री अजित पवार यांच्या हस्ते भूमीपूजन करण्यात आलं. त्यावेळी राज्याचे सामाजिक न्याय मंत्री धनंजय मुंडे हेही उपस्थित होते. यावेळी माध्यमांनी त्यांना किरीट सोमय्यांबद्दल प्रश्न विचारला असता मुंडेंनी चक्क हात जोडले.

आज औंध जिल्हा रुग्णालय परिसरात उपमुख्यमंत्री अजित पवार यांनी सामाजिक न्यायमंत्री धनंजय मुंडे यांनी हजेरी लावली होती. अजित पवार यांच्या हस्ते जिल्हा दिव्यांग पुनर्वसन केंद्राची उभारण्यात येणाऱ्या इमारतीचे भूमीपूजन झाले. सर्वांची भाषणे झाली, अजित पवार यांना मुंडे यांनी गाडीपर्यंत सोडलं. त्यानंतर ते प्रसारमाध्यमांना प्रतिक्रिया देत होते.

ते म्हणाले की, दिव्यांग व्यक्तींना ग्रामपंचायतीपासून ते महानगर पालिकेपर्यंत तीन टक्के मिळणारा निधी त्यांना मिळत नाही हा त्यांचा आरोप आहे. परंतु, मी या विभागाचा मंत्री झाल्यापासून फार सुधारणा झाल्यात. ज्या संस्था पैसे आपल्याकडे ठेवायच्या आणि दिव्यांगाना द्यायच्या नाहीत, त्यांना असं सांगण्यात आलं आहे की त्यांना ते पैसे दिले पाहिजेत. मी आत्ता तुमच्यासमोर या विभागाच्या आयुक्तांना सांगतो अशा संस्थांना खड्यासारखे बाजूला काढा आणि दिव्यांग व्यक्तीचे पैसे त्यांना द्या. त्यामुळं दिव्यांग व्यक्तींनी झालेला गैरसमज दूर करावा.

दरम्यान, प्रसारमाध्यमांच्या प्रतिनिधींनी किरीट सोमय्या यांच्यावर प्रश्न विचारताच धनंजय मुंडे यांनी हात जोडून बोलण्यास नकार दिला.